Konventa dy-ditore mblodi biznese të Diasporës dhe Kosovës në Prishtinë me qëllim të krijimit të lidhjeve dhe partneriteteve mes bizneseve, për të rritur eksportet dhe ndihmuar rritjen ekonomike të Kosovës.

Në ditën e parë të Konventës në panel u diskutu rreth Diplomacisë Komerciale, pastaj u mbajtën takimet B2B, ku bizneset e Diasporës u takuan me ato të Kosovës nga sektorët e Përpunimit të Drurit, Përpunimit të Ushqimit, dhe Teknologjisë së Informacionit dhe Komunikimit – TIK.

Në ditën e dytë të Konventës bizneset nga Diaspora vizituan biznese të ndryshme të Kosovës për të parë për së afërmi kapacitetet prodhuese të kompanive vendore. Konventa u përmbyll tek Parku i Inovacionit dhe Trajnimeve (ITP) në Prizren.

Konventa e Biznesit të Diasporës në Kosovë – Bashkëpunim për Eksport u organizuan nga Degët Evropiane të Rrjetit të Bizneseve Shqiptare dhe USAID Kosovo Compete Activity, në partneritet me organizatën Germin dhe shoqatat e sektorëve të Përpunimit të Drurit (SHPDK), Përpunimit të Ushqimit (Organika, PePeKo) dhe Teknologjisë së Informacionit dhe Komunikimit – TIK (STIKK, ICK).